Tókst ekki :-(

Alveg er þetta nú dæmigert.

Eins og aðstöðumálum er háttað í dag, þurfa þeir sem hafa eitthvað með seglbáta að gera, á tveimur logndögum að halda á ári. Það er þegar bátarnir eru sjósettir og teknir á land. Nú um helgina átti sem sagt að reyna að koma þeim hluta flotans sem heldur til í Hafnarfirði, á flot. En - eins og glöggir hafa kannski tekið eftir var hægviðrið svona í stífara lagi. En eins og málshátturinn segir, "það gengur bara betur næst".

Ég er alveg brjálaður...!

Allt of oft gerist það að hlutir eru slitnir úr samhengi sínu og notaðir af misvitrum aðilum til hluta sem eru fjarri upphaflegum tilgangi þeirra. Þannig voru kenningar Darvins m.a. notaðar til að réttlæta þjóðernishreinsanir og rannsóknir fremstu eðlisfræðinga (og jafnframt mannvina) á fyrri hluta síðustu aldar leiddu af sér kjarnorkusprengjuna þegar pólitíkusar komust í málið.

Nú hefur fyrirbærið Kaupþing (áður Kaupþing, síðan Kaupþing Búnaðarbanki svo KB banki og loks aftur Kaupþing) slegist í þennan ófagra hóp með því lúabragði að KAUPA hina sígildu og ástkæru LÍNU og VOGAÐ SÉR að gera hana að AUGLÝSINGU fyrir prang sitt og gullkálfadans!!!

"Haltu þínu striki með tekjuvernd - Kaupþing"

OJBARASTA OG SKAMMISTYKKAR

 Á sínum tíma var línan höfð sem innslag milli atriða í sjónvarpinu þegar stutt bil gafst milli dagskrárliða. Hún var í raun aldrei á dagskrá en þó mátti alltaf eiga von á henni. Og þarna kom hún og létti manni lund (raunar fólki á öllum aldri) meðan beðið var eftir Derrik  - alveg óvænt, svona svipað og þegar maður fær óvæntan millirétt eins og stundum gerist á betri veitingastöðum. 

Ekki veit ég hvar þeir menn sem bera ábyrgð á þessum siðlausa gjörningi, héldu sig meðan línan gladdi hjörtun - e.t.v. inni í herbergi að telja aurana í sparibauknum sínum.

Ég er með sambærilega hugmynd að auglýsingu:

Þórður húsvörður er að sópa í rólegheitum þegar dyrnar eru brotnar upp og þrír menn ryðjast inn. Skiptir engum togum að Þórður er barinn í buff með hafnarboltakylfu af einum þeirra meðan hinir rústa staðnum og bera út ýmsa húsmuni. Í lokin liggur Þórður í blóði sínu, allt er á tjá og tundri og yfir skjáinn rennur blóðrauður texti:

HEIMAVÖRN SECURITAS: ÞÚ VEIST ALDREI HVER ER NÆSTUR!!!

Niðurstöður dekkjadagsins

oooOOOGGGG.... (trommur) FYRIR VALINU VARÐ NEXEEENNN...!!!

Ég hef reyndar, frá því að ég fór að spá í þessi dekkjamál, verið að gjóa augum á þessi dekk (NEXEN N2000). Verðið er vissulega hagstætt, sérstaklega miðað við Pirelli (2 fyrir 1) og þar sem ég var ekki að leita að heilsársdekkjum minnkaði úrvalið töluvert. Einnig er úrvalið farið að minnka þegar dekkjastærðin er 16" en uppistaða fólksbílaflotans er á 13" - 15" dekkjum.

Þá var maður svolítið forvitinn því ég hef aldrei áður verið með V-munstruð dekk.  Verður gaman að sjá hvernig þau virka undir stórum stationbíl með gas/vökvafjöðrun - eru fremur hugsuð fyrir minni og sprotlegri bíla. Hins vegar munu þau á móti henta aksturslagi konunnar prýðilega - hönnuð fyrir hraða allt að 240 km

Varðandi  vetrardekkin sem voru undir (Pirelli Winter Snowsport) þá munu þau öll með tölu sjá sinn þriðja vetur! Það verður í fyrsta sinn í minni bílasögu sem vetrardekk verða eldri en tvævetur. Vera má að það tengist því að við höfum ekki áður átt bíl með spólvörn Þau kosta vissulega alveg ÓGEÐSLEGA mikið og við hefðum ALDREI keypt þau að óreyndu (fengum þau með bílnum), en nú hafa þau sýnt sig og sannað og ég er ekki frá því að núna mundi maður bara sveifla kortinu og kaupa þau á VISA-rað.

"Starfsdagur" og "dekkjadagur"

Í dag er starfsdagur á leikskólanum þar sem litla rauðhærða ljónið er alla jafna á virkum dögum. Mér finnst nafnið "starfsdagur" alltaf jafn skondið. Hver er munurinn á starfsdegi og vinnudegi? Hvað með skipulagsdagur eða námskeiðsdagur eða fundardagur eða kynningardagur, svo að eitthvað sé nefnt.

Niðurstaðan er a.m.k. sú að ég verð heima í dag og tek þar með langa helgi.

Reyndar býst ég við að fara eftir hádegið og leita uppi einhver álitleg sumardekk undir fjölskyldubílinn. Um er að ræða aldeilis frábæran Citroen C5 og dekkin eru 215/55 R16 ef það segir einhverjum eitthvað.

Sem stendur er hann á alveg frábærum en hálfslitnum Pirelli vetrardekkjum (ónegldum að sjálfsögðu) sem ég tími bara ekki að eyðileggja alveg með sumarakstri. Það er hins vegar verulegur hausverkur að velja sumardekk og að auki eru þau ekki sérlega ódýr. Dekk eins og hann kom á upphaflega kosta 20 - 25 þús. stykkið og verðbilið er 10 - 30 þús. Nokian, Pirelli, Michelin, Nexen, Dunlop, Continental, Goodyear, Falken og hvað þetta heitir nú allt saman. Kannski maður renni bara upp að næsta dekkjaverkstæði og panti fjórfaldan dekk með öllu.

Verður fróðlegt að sjá niðurstöðuna í lok dags...

Sumarfrísskipulagningardagar

Jamm. Núna þarf maður að fara að velta fyrir sér hvenær, hvar og hvernig maður ætlar að eyða þessum sumardögum sem maður á í sumarorlof. Vestur (heim) er ómissandi og verður að öllum líkindum í byrjun júlí. Svo langar mann að komast eitthvað austur um land, en þangað hefur maður bara farið í vinnuferðir. Svo er verslunarmannahelgin seint og að henni liðinni er maður á leið til Kanada á ráðstefnu. Svo er spurning um að fara aftur vestur í september og ná sér í nokkur ber og smá myrkur . 

Díses mar... Hvað er að gerast hérna??? Þabbbara miður apríll !!!

En jú, þetta er víst það sem gerist þegar leikskólar loka og vinnustaðurinn þarf að skipuleggja starfið með hliðsjón af því hverjir verða til taks á hverjum tíma.

Ætli maður endi kannski bara sem fílófaxnörd...?

Standast forsemdur ályktunarinnar?

Samkvæmt þeim upplýsingum sem liggja aðgengilegastar á heimasíðu hafró eru upplýsingar um fæðusamsetningu hvala á miðunum umhverfis landið af skornum skammti og bjóða vart upp á afgerandi túlkun þegar kemur að því að meta áhrif hvalastofna á nytjastofna. Síðan er spurning um áhrif stofna sem ekki eru veiðistofnar eins og háhyrninga, höfrunga, seli og sjófugla.

Er misminni hjá mér að "fjölstofnalíkan" hafró hafi ekki sýnt fram á nein merkjanleg áhrif hvala á nytjastofna? Finn ekkert um það í fljótu bragði. 

Svo er ég ögn hissa á að "sáttagreinin" skuli ekki hafa farið inn, því það er orðið nokkuð ljóst að hvalveiðar verða ekki stundaðar af nokkru marki nema með viðurkenningu og í nokkurri sátt við aðrar þjóðir - nema við ætlum að éta þetta allt saman sjálf. 

Hvalveiðar í atvinnuskyni mikilvægur áfangi

Þráðleysið er yndislegt

Gamla iBookin mín hefur fengið frelsi ef svo má segja. Tölvan er af gerðinni iBook SE 466 og komst glæný í mína eigu í mars 2001.  Á dögunum útvegaði ég mér netkort í hana, en þau hafa ekki legið á lausu í langan tíma og voru bæði rándýr og lítt praktísk á árum áður. Nú er það hins vegar svo að þráðlaus net eru um allt og því er nú gripurinn aftur kominn með fullt notagildi þegar kemur að vefrápi og léttri vinnslu, en ekki bara söfnunar og tilfinningalegt gildi.Það er nefnilega þannig að vélin hefur gengið alveg vandræðalaust allan þennan tíma. Á myndinni sést hver vélbúnaðurinn er og sú staðreynd að hún keyrir nýjasta stýrikerfið frá Apple og gerir það alveg furðu vel (gaman væri að sjá einhvern reyna að keyra windows vista á miðlungs öflugri pc fartövu frá árinu 2001)

 

Oft er bull í páskaeggi

Í dag er páskaeggjadagur. Í dag hefur fólk ráðist til atlögu við súkkulaðiegg, mölvað þau mélinu smærra og hámað í sig ásamt innihaldi þeirra. Þessi egg eru af ýmsum gerðum, púkaegg, ástaregg, mónuegg o.s.frv, - lítil og stór. Eitt eiga þau þó sameiginlegt, en að er að innan í þeim er fyrirbæri sem kallast málsháttur. Eins og flestir vita er þetta pappírsræma sem á er prentað eitthvert spakmæli - gjarnan eitthvað á þá lund að maður skuli bara vera ánægður með það sem maður hefur, eða að það sé sniðugt að fara snemma á fætur. Þegar vel tekst til eru þetta hnitmiðuð skilaboð, gjarna með innri hrynjandi - örljóð. 

Nú er hins vegar eins og eggjaverpendur hafi sumir hverjir verið fóðraðir á einhverju sem hefur valdið þroskafráhvörfum og jafnvel stökkbreytingum í málsháttagenunum. Hér innanhúss hafa í dag þrjú egg mætt örlögum sínum og aðeins í einu þerra var nokkurnveginn eðlilega vaxinn málsháttur um dyggðir þess að fara snemma að sofa eða eitthvað þess háttar. Hinir voru... ja... hvað skal segja..... SVONA:

Konan er ólokið verk frá skaparans hendi, sem hann hefur ætlað karlmanninum að ljúka við 

og

Böl er búskapur, hryggð er hjúskapur, aumt er einlífi og að öllu er nokkuð

(Kvenfyrirlitning og svartagallrsraus)!!! 

Ég skil ósköp vel að fólk sé orðið leitt á þessu gömlu og góðu, en ég er ekki frá því að leit einhverra eggjaframleiðenda að nýju efni til að stöffa upp páskaeggin hafi leitt hina sömu út í mýri.  

Það verður fróðlegt að fylgjast með þróuninni á málsháttum í framtíðinni.  Fara menn að taka upp hnyttnar línur eins og:

I was born to be a kid killer, I was born to be a horror freak

eða

Feminískar beljur súpa sjálfsagt hveljur

svo maður taki dæmi úr íslenskri "dægurtónlist" 

Um álversblogg...

Það er búið að vera skondið að fylgjast með moggablogginu kringum þessa álveskosningu. Margir þeirra sem þar tjá sig þyrftu svo sannarlega á þessu að halda.

Öðruvísi borðskreyting

Í gær var ég staddur á málþingi því sem um er fjallað í færslunni hér að neðan. Eins og títt er á samkomum var þarna afgreiðsluborð þar sem gestum voru veittar upplýsingar og dagskrá lá frammi. Eins og algengt er þá var sett upp borðskreyting á afgreiðlsuborðinu. Yfirleytt eru þessar skreytingar hver annari líkar, blómakarfa eða eitthvað þess háttar. Í þetta skipti var breytt út af venjunni og efni þingsins látið ráða gerð skreytingar - sem sagt eitthvað blautt. Í vatnsfylltri 20 lítra glerkrukku á enda borðsins var lifandi kúluskítur og umhverfis hann syntu hornsíli veidd í 101-Rvk.

Skreitingin lét lítið yfir sér en vakti þó verulega athygli ráðstefnugesta. Sérstaka athygli okkar, sem útveguðum efniviðinn í skreytinguna, vakti hins vegar að samkvæmt upplýsingum á málþinginu hafði tilvist hornsíla ekki áður verið staðfest í 101.

Þegar skreytngin hafði svo gengt hlutverki sínu var hornsílunum skilað aftur í tjörnina sína og kúluskítnum í búrið sitt. Umhverfisvænleiki og endurnýting sem svo sannarlega hæfði efni ráðstefnunnar.