Metanbílar loksins að komast að...?

Nú eru metandagar í hjá Volkswagen á Íslandi ! Verið er að kynna nokkrar gerðir bíla sem brenna bæði bensíni og metani og er uppsetning bílanna þannig að metan er orkugjafi nr. 1.

Ef ég væri að hugleiða bílakaup í dag mundi ég skoða þetta virkilega vel. Hugsanlega væri þarna komin ástæða sem fengi mann til að skipta úr frönskum unaði yfir í þýska röð og reglu. Bara það að geta nýtt innlent eldsneyti vegur þungt í mínum huga - ekki síst núna á þessum síðustu og verstu. Svo spillir verðið á því ekki fyrir.

Það er náttúrlega alveg út í hött að aukaafurðinni metani, skuli vera brennt í stórum stíl á öskuhaugunum í Álfsnesi, en samt einhvern vegin svo dæmigert fyrir okkur íslendinga (hauggas... ojbara). 

Þetta framtak þeirra VW manna á sannarlega hrós skilið og hlýtur að bera árangur.

Athugasemdir

[Geir Ágústsson, 15.10.2009 kl. 20:49]

Stálefnaður Jarðarbúi eins og þú hefur sennilega efni á allskonar rándýrri tækni og neyslu.

Mér sýnist þú þar að auki hafa dottið inn á stórsnjalla viðskiptahugmynd sem hefur farið framhjá öllum öðrum - að "nýta" eitthvað sem er bara brennt í dag! Hvernig í ósköpunum stendur á því að þvílík sóun á einhverju sem þú telur arðbært skuli hafa átt sér stað! Einhverjar hugmyndir?

[Haraldur Rafn Ingvason, 15.10.2009 kl. 22:04]

Ja, ég þarf á bíl að halda - vissulega neysla - og já, mér finnst alveg brilljant að nýta sem eldsneyti eitthvað sem áður hefur verið hent.

Ertu ekki sammála?

Svo eru þessir bílar á "hagstæðu" verði vegna tollaafsláttar...

[Sigurður Hreiðar, 15.10.2009 kl. 23:17]

Er metani brennt í Álfsnesi? Síðast þegar ég vissi var það sem ekki var selt sem eldsneyti á bíla notað til raforkuframleiðslu. Hefur því verið hætt?

Hitt er annað mál að þegar einhver brögð fara að vera að því að landinn noti metan á bíla sína verður snarlega settur skattur á metanið svo það verði álíka dýrt og jarðefnaeldsneyti. 

Dettur einhverjum annað í hug?

[Haraldur Rafn Ingvason, 16.10.2009 kl. 12:58]

Jamm, metani er brennt þar sem ekki er markaður fyrir nema brot af því sem til fellur í Álfsnesi. Ég veit ekki til að því sé safnað annarsstaðar ef frá er talinn sveitabær sem ég heyrði af, þar sem vferið er að gera tilraunir með að vinna það úr haughúsinu.

Stóra málið er að af þessu má hafa verulegan sparnað í formi innkaupa á eldsneyti. Vissulega munu forheimsk stjórnvöld framtíðarinnar líta á það sem tekjutap, en við því verður þá að bregðast þegar það að kemur.

[Sigurður Hreiðar, 16.10.2009 kl. 15:25]

Ég trúi því ekki að ekki sé markaður fyrir rafmagn. Það kemur þá þvert á orkuumræðuna. Hafið þið kannað málið hjá Sorpu?

Og þetta með sveitabæinn og haughúsið: Það eru frekar heil sveitarfélög eða sambærileg samfélög sem hafa kannað möguleikana á þessu, en ég veit ekki til að þetta sé komið á tilraunastigið.