Hugur á reiki: hrísgrjónagrautur og ...

Það er alltaf smá skrítið hvernig hugurinn reikar. Sit hér og þvælist um vefinn og allt í einu er ég að hugsa um hrísgrjónagraut! Sennilega verður hann bara í matinn á morgun. Litla dýrið vill hafa lifrarpylsu með honum.

Á þessum bæ sé ég um grautargerðina. Teingdó þótti það í hæsta máta undarlegt, en það er nú svo margt undarlegt við mig að hennar mati. Og aðferðin við að elda grautinn...!  Þá varð hún kjaftstopp - sem gerist ekki oft, frekar en hjá dóttur hennar. 

Þetta er í raun ósköp einfalt. 3-4 bollar af gamaldags River rice grjónum í pott, 2-3 bollar af vatni útá og látið sjóða duglega. Þegar vatnið er að mestu horfið er smá mjólk skellt útí og hrært þar til þykknar. Þá er meiri mjólk bætt í, látið þykkna og svo koll af kolli.Trikkið er bara að draslið brenni ekki við en það er ekkert mál. Maður verður bara að nenna að passa suðuna og hræra í þessu.

Alls fara í þetta 1,5 - 2 lítrar af mjólk og þetta tekur svona 30-45 mínútur. Í restina, eða þegar grjónin eru að verða soðin, er bætt við salti og stundum rúsínum eða vanillusykri. Gott er að láta hann standa aðeins og jafna sig áður en honum er mokað í skálar og mjólk og kanilsykri (og lifrarpylsu (og salti)) skellt útá.

Þetta gengur mjög vel í mannskapinn, svo vel að ég minnist þess ekki að afgangur af svona graut hafi nokkru sinni dagað uppi í ísskápnum. 

Bíddu... uuu...  hvað er eiginlega að gerast, hvað er þessi bjór að þvælast hérna...? 

Best að senda þetta í hvelli áður en þetta fer út í tóma vitleysu................ 

Athugasemdir

[Magnús Björnsson, 8.1.2008 kl. 10:41]

Mmmm........ grjónagrautur.... og slátur.......

Gleðilegt ár

[Gurra (IP-tala skráð) 8.1.2008 kl. 14:41]

Bíddu og hvað er svona athugavert við það hvernig þú gerir grjónagrautinn? Ég þarf etv að skoða þetta betur...finnst þetta ofur eðlileg eldunaraðferð á grjónagraut, amk geri ég hann alltaf nákvæmlega eins og þú virðist gera hann! Nema það er eitt...fjandans grauturinn brennur alltaf aðeins við hjá mér...trikkið er líklega að vera á bak við eldavélina...eins og Guðni myndi orða það!!!....en þá á maður eins og eitt stk Einar sem sjá um að þrífa viðbrenndar pottaskammir.

Hef annars aldrei skilið þetta með lifrarpylsuna og grautinn...sóun á dýrindis pylsu að setja hana saman við grjónin.

kv. gurra

[Magnea (IP-tala skráð) 8.1.2008 kl. 15:45]

Það er bara verið að skjóta á mann í hverri færslu  

Varðandi grjónagrautinn þá er það að hafa tíma og þolinmæði til að standa við pottinn allan tímann og hræra.  Ég er ekkert að rembast við þetta, grauturinn þinn er svo góður

Bestu kveðjur

Magnea