Ný náttúruverndarlög - um hvað er rifist...?

Á dögunum voru loksins samþykkt ný náttúruverndarlög. Þau byggja á lögum sem taka áttu gildi 2013 en voru stöðvuð á seinustu stundu og áttu að fara í tætarann. Það varð hinsvegar ekki sem betur fer og nú eru þau komin í gildi með nokkrum breytingum.

Sú breyting sem mest hefur farið fyrir brjóstið á fólki varðar 18. greinina þar sem fjallað er um umferð gangandi manna um óræktað land. En hvað er það sem fólk er að setja þarna fyrir sig? 

Í áður gildandi lögum frá 1999 hljómaði greinin (þá nr. 14)svona:"14. gr. Umferð gangandi manna. Mönnum er heimilt, án sérstaks leyfis landeiganda eða rétthafa, að fara gangandi, á skíðum, skautum og óvélknúnum sleðum eða á annan sambærilegan hátt um óræktað land og dveljast þar. Á eignarlandi í byggð er eiganda eða rétthafa þó heimilt að takmarka eða banna með merkingum við hlið og göngustiga umferð manna og dvöl á afgirtu óræktuðu landi."

Í lögunum sem taka áttu gildi 2013 var þessi grein nr. 18 og hljómaði eftirfarandi: "18. gr. Umferð gangandi manna. Mönnum er heimilt, án sérstaks leyfis landeiganda eða rétthafa, að fara gangandi, á skíðum, skautum og óvélknúnum sleðum eða á annan sambærilegan hátt um óræktað land og dveljast þar. Þó er í sérstökum tilvikum heimilt að takmarka eða banna með merkingum við hlið og stiga för manna og dvöl á afgirtu óræktuðu eignarlandi í byggð ef það er nauðsynlegt vegna nýtingar þess eða verndunar."

Lokaniðurstaðan varð hins vegar á þessa leið: "6. gr. Eftirfarandi breytingar verða á 18. gr. laganna: 2. málsl. 1. mgr. orðast svo: Á eignarlandi í byggð er eiganda eða rétthafa þó heimilt að takmarka eða banna með merkingum við hlið og göngustiga umferð manna og dvöl á afgirtu óræktuðu landi."

Eitthvað hefur verið um að fólk hefur talið að í hinum nýju lögum fælist stórkstleg breyting á s.k. almannarétti og með þeim væri verið að gefa færi á að loka landinu með alveg nýjum hætti. Þegar málið er skoðað sést hins vegar að ekki er um breytingu að ræða frá áður gildandi lögum. Þetta hefur gengið svo langt að áberandi álitshafar hafa gengið fram og kallað fólk miður virðulegum nöfnum, heimtað afsökunarbeiðnir o.s.frv. 

Það má hinsvegar velta fyrir sér af hverju 18. greinin var ekki látin halda sér eins og m.a. er fjallað um í fréttatilkynningu SAMÚT. Það virðist hins vegar ljóst að pólitíkin telji sig vanta meiri tíma til að forma þetta atriði eins og kemur fram í 37. gr. lokaniðurstöðunnar, en það segir í 7. málsgrein: "Ráðherra, í samráði við hlutaðeigandi ráðherra, skal láta vinna frumvarp um ný ákvæði er taki til stýringar á ferðaþjónustunni með hliðsjón af reglum um almannarétt og á grundvelli náttúruverndar og nauðsynlegrar auðlindastýringar sem nýting ferðaþjónustunnar á náttúrunni hefur óhjákvæmilega í för með sér. Stefnt skal að því að ráðherra leggi fram frumvarp þess efnis í síðasta lagi á haustþingi 2017.

Um leið og ég vil óska þingheimi til hamingju með að hafa tekist að koma sér saman um lög um náttúruvernd langar mig að hvetja álitshafa til að eiga inni fyrir stóryrðum áður en stokkið er fram á ritvöllinn. 

Athugasemdir

[4X325000 (IP-tala skráð) 22.11.2015 kl. 20:12]

Ertu að villa um fyrir fólki vísvitandi?

[Haraldur Rafn Ingvason, 22.11.2015 kl. 20:29]

Ertu hættur að berja konuna þína...?

[Haraldur Rafn Ingvason, 22.11.2015 kl. 20:34]

Ofangreind komment eru dæmi um spurningar sem ekki er með góðu móti hægt að svara með já eða nei. 

Spurning hvort 4X325000 vill reyna aftur og forma þá efnislega spurningu sem hægt er að svara...

[4X325000 (IP-tala skráð) 22.11.2015 kl. 21:49]

Nei því miður  ekki hætta því sem ekki er hafið. En það hefur kannski alveg farið fram hjá þér að gagnrýnin á nýju náttúruverndarlöginn snérist ekki um för fótgangandi fólks, heldur þann fararmáta sem það hefur haft sjálfdæmi um að velja sér um eigið land hingað til.

[Haraldur Rafn Ingvason, 23.11.2015 kl. 00:33]

Fjaðrafokið var um 18. greinina, sem er óbreytt (14. gr) frá lögunum frá 1999. Þar er tiltekinn sá ferðamáti sem greinin nær yfir sem vissulega er fleira en ganga, eins og sjá má ér að ofan. Ónákvæmni af minni hálfu - takk fyrir að benda mér á þetta, laga það.

Var þetta punkturinn???